థిల్లర్ కథలు

డిగ్రీ ఫస్ట్ క్లాస్‌లో పాసయితే బైక్ కొనిస్తానని తండ్రి ఈశ్వర్ మాట ఇవ్వడంతో, రాత్రింబగళ్లు కష్టపడి చదివాడు గగన్. కానీ ఫలితం ఉల్టా అయింది; తను ఫెయిల్ అయ్యాడు. అనుకున్నట్లుగానే ఈశ్వర్ బైక్ కొనివ్వడానికి వీల్లేదన్నాడు. కానీ బైక్ పైన అమితమైన ఇష్టం పెంచుకున్న గగన్, ఎలాగైనా సరే దాన్ని సాధించాలని మొండి పట్టు పట్టాడు. తిండి మానేశాడు, ఇంట్లో వాళ్లతో అలక పూనాడు. అయినా సరే ఈశ్వర్ అస్సలు కరగలేదు. తన కోరిక నెరవేర్చలేదనే కోపంతో… చుట్టాలు, కుటుంబసభ్యుల ముందు తన పరువు తీసేసిన ఇలాంటి తండ్రికి తగిన శాస్తి జరగాలని గగన్ మనసులో మొండిగా అనుకున్నాడు.
నెల రోజుల పాటు కొడుకు చేసిన నిరాహార దీక్షను చూసి తల్లి సుభద్ర మనసు కరిగిపోయింది. తన దగ్గరున్న చిట్టీ డబ్బులను బయటకు తీసి, డౌన్ పేమెంట్ కట్టి, ఇ.ఎమ్.ఐ (EMI) పద్ధతిలో బైక్ కొని గగన్ చేతిలో పెట్టింది. అయితే నెల నెలా ఇ.ఎమ్.ఐలు కట్టడం తన వల్ల కాదని, ఏదో ఒక దారి చూసుకుని ఆ ఆరు వేల రూపాయల (₹6,000/-) ఈక్వేటెడ్ మంత్లీ ఇన్‌స్టాల్‌మెంట్‌ను గగనే కట్టుకోవాలని కండిషన్ పెట్టింది.కోరుకున్న బైక్ కళ్లముందుండేసరికి గగన్ సంతోషానికి హద్దులు లేవు. దాన్ని తన ప్రాణం కంటే ఎక్కువగా చూసుకోవడం మొదలుపెట్టాడు. కానీ నెల గడిస్తే ఇ.ఎమ్.ఐ కట్టాలి కదా! మొదటి మూడు నెలలు స్నేహితుల సహాయంతో, తెలిసిన కుర్రాళ్ల దగ్గర అప్పులు చేసి ఎలాగోలా మేనేజ్ చేశాడు. కానీ రోజులు గడుస్తున్న కొద్దీ ఆ అప్పులు ఇచ్చిన వాళ్ల నుండి డబ్బులు తిరిగి ఇవ్వమని ఒత్తిడి పెరిగింది.ఆ ప్రెషర్ తట్టుకోలేక గగన్ ఒక ఫేక్ డ్రైవింగ్ లైసెన్స్ సృష్టించి ‘ఈకార్ట్’ (eKart) కంపెనీలో డెలివరీ బాయ్‌గా జాయిన్ అయ్యాడు. నెలలు గడుస్తున్న కొద్దీ నెమ్మదిగా అప్పులన్నీ తీరుస్తూ, ఇంటి ఖర్చుల కోసం కూడా కొంత అమౌంట్ ఇవ్వడం స్టార్ట్ చేశాడు. దాంతో గగన్ పై తండ్రి ఈశ్వర్‌కు ఉన్న కోపం కాస్త తగ్గింది.
రిపబ్లిక్ ఫెస్టివల్ సేల్ రావడంతో ఆ రోజు ఆఫీస్‌లో ఆర్డర్స్ విపరీతంగా వచ్చాయి. ఉదయం తొమ్మిది గంటలకే ఆఫీస్‌కు వెళ్లి లోడ్ అంతా తీసుకుని వస్తుండగా, దారిలో ఒక గ్రామ కులదేవత గుడి ఓపెనింగ్ జరుగుతోంది. కాస్త ప్రసాదం తిని వెళ్దామని ఆగిన గగన్, అక్కడ ఒక అమ్మాయిని చూసి అలాగే నిలబడిపోయాడు.గొంగళి పురుగుల మధ్యలో ఒక అందమైన సీతాకోకచిలకలా… అక్కడున్న జనాల మధ్యలో ఆమె అందం మెరిసిపోతూ గగన్‌ను ఆకర్షించింది. తను వచ్చిన పని, వెళ్లాల్సిన సమయం అన్నీ మరిచిపోయి ఆమె వెనకాలే నీడలా తిరగడం మొదలుపెట్టాడు. ఆమె కూడా గగన్‌ను గమనించింది కానీ, నల్లటి జుట్టులో ఉండే తెల్ల వెంట్రుకను తీసిపారేసినట్లు అతన్ని లైట్ తీసుకుంది.ఆమె అందం కంటే, ఆమె చూపించిన ఆ పొగరు గగన్‌కు బాగా నచ్చింది. పెళ్లి చేసుకుంటే ఈ అమ్మాయినే చేసుకోవాలని అక్కడికక్కడే డిసైడ్ అయ్యాడు. పట్టు వదలని విక్రమార్కుడిలా ఆమెను వెంబడించి, ఆమె పుట్టుపూర్వోత్తరాలు కనుక్కున్నాడు. ఇంటికొచ్చి ఈశ్వర్, సుభద్రలతో విషయం చెప్పాడు. ఆమె పేరు మాధవి. రామారావు, మీనాక్షి దంపతులకు ఆమె ఒక్కతే కూతురు.ఎప్పటికైనా కొడుక్కి పెళ్లి చేయక తప్పదు కదా అని అనుకున్న ఈశ్వర్, ఆలస్యం చేయకుండా మాధవి తల్లిదండ్రులతో మాట్లాడి సంబంధం ఖాయం చేశాడు. అయితే మాధవి పెళ్లికి కొన్ని షరతులు పెట్టింది. పెళ్లయ్యాక కాపురం తన పుట్టింట్లోనే చేయాలని, ఆ పైన ఇంటి ఖర్చులన్నీ గగనే భరించాలని, పెళ్లికి ఎలాంటి కట్నం ఇవ్వనని ఇలా కొన్ని చిన్న చిన్న కండిషన్లు పెట్టింది. వాటికన్నింటికీ గగన్ ఓకే అనడంతో ఇద్దరి పెళ్లి ఘనంగా జరిగింది.పెళ్లయిన మొదటి మూడు రాత్రులు గగన్‌కు ఎంతో వినోదంగా, స్వర్గంలా గడిచాయి. కానీ ఆ తర్వాత రాబోయేవి అన్నీ కాలరాత్రులని అప్పుడు అతనికి అర్థం కాలేదు.కొత్త పెళ్లి కావడం, ఒకపక్క మాధవి ఇంట్లోకి కావాల్సిన సరుకుల ఖర్చులు, మరోపక్క బైక్ ఇ.ఎమ్.ఐ డేట్ దగ్గర పడటంతో గగన్ ఎక్కువ సమయం డ్యూటీలోనే గడపాల్సి వచ్చేది. హెవీ లోడ్ ఉండటంతో రోజూ లగేజ్ బ్యాగ్ మోసి మోసి నడుము నొప్పితో చస్తూ ఇంటికొచ్చేసరికి మాధవి అప్పటికే తినేసి పడుకునేది. కిచెన్‌లో మిగిలిపోయిన అన్నం, కూర ఏదో ఒకటి తిని తను పడుకునేవాడు. మళ్లీ కళ్లు తెరిచి మెలుకువ వచ్చేసరికి డ్యూటీ టైమ్ అయిపోయేది.
కానీ ఒకరోజు… జోరుగా వర్షం కురుస్తున్న రాత్రి గగన్ తన వర్క్ త్వరగా పూర్తి చేసుకుని ఇంటికి బయలుదేరబోతుండగా సుభద్ర నుండి ఫోన్ వచ్చింది. నాన్నకు హెల్త్ అస్సలు బాగోలేదని, అర్జంట్‌గా మందులు తీసుకురమ్మని ఏడ్చింది. కంగారుపడిపోయిన గగన్, తండ్రికి కావాల్సిన మెడిసిన్స్ కొని, ఆ వర్షంలోనే బైక్‌ను అత్యంత వేగంగా నడుపుకుంటూ వెళ్లాడు. ఆ చీకటిలో, వాన హోరులో దారి సరిగ్గా కనిపించక… రోడ్డు పక్కన నడుచుకుంటూ వెళ్తున్న ఒక వృద్ధ దంపతులను గగన్ తన బైక్‌తో బలంగా ఢీకొట్టాడు.భయంతో గుండె ఆగిపోయినంత పనైంది. బైక్ హెడ్‌లైట్ వెలుతురులో రోడ్డుపై రక్తం మడుగులో పడి ఉన్న ఒక చేయి, దానికి ఉన్న టైటాన్ వాచ్ మాత్రమే అతనికి కనిపించాయి. చుట్టుపక్కల ఎవరూ లేకపోవడంతో, తండ్రికి మందులు ఇవ్వాలనే తొందరలో వెనక్కి కూడా చూడకుండా బైక్ యాక్సిలరేటర్ పెంచి అక్కడి నుండి పారిపోయాడు. ఆ ప్రమాదంలో ఆ వృద్ధ దంపతులు అక్కడికక్కడే ప్రాణాలు కోల్పోయారు. వాళ్లు అండమాన్ దీవుల ట్రిప్ బుక్ చేసుకుని, సంతోషంగా ఇంటికి తిరిగి వస్తుండగా ఈ ఘోరం జరిగింది. ఆ హిట్ అండ్ రన్ కేసు నుండి గగన్ తన ఫేక్ డ్రైవింగ్ లైసెన్స్ వల్ల ఈజీగా తప్పించుకున్నాడు.రోజులు గడిచాయి. ఒకరోజు గగన్ తన ఆర్డర్లన్నీ చాలా త్వరగా డెలివరీ చేసేశాడు. కానీ కేవలం ఒక్క ఆర్డర్ మాత్రం మిగిలిపోయింది. ఆ ఒక్కటి కూడా ఇచ్చేస్తే త్వరగా ఇంటికెళ్లి, ఈరోజు మాధవితో హ్యాపీగా గడపొచ్చని అనుకున్నాడు. ఆమె కోసం దారిలో మల్లెపూలు కొనాలని కూడా మనసులో ప్లాన్ చేసుకున్నాడు.కానీ ఆ లాస్ట్ డెలివరీ తీసుకోవాల్సిన వ్యక్తికి ఎన్నిసార్లు కాల్ చేసినా ఫోన్ లిఫ్ట్ చేయడం లేదు. సమయం వృథా అవుతోంది. “త్వరగా ఇంటికెళ్లి మాధవితో గడపొచ్చు కదా, ఇక్కడెందుకు టైమ్ వేస్ట్ చేస్తావ్” అని మనసు తొందరపెడుతుంటే, “ఈ ఒక్క డెలివరీ ఇస్తే ఎక్స్‌ట్రా మనీ వస్తుంది, అది మాధవి ఇంటి ఖర్చులకి పనికొస్తుంది” అని బ్రెయిన్ ఆలోచించింది. చివరికి బ్రెయిన్ మాటను పక్కనపెట్టి, మనసు మాట విని ఆ ఒక్క డెలివరీని క్యాన్సిల్ చేసి ఇంటికి తిరుగుప్రయాణమయ్యాడు గగన్.సగం దూరం దాటిన తర్వాత చీకట్లో ఒక వ్యక్తి లిఫ్ట్ అడుగుతూ చేయి చాచాడు. బైక్ వెలుతురులో అతని చేయి తప్ప ముఖం స్పష్టంగా కనిపించలేదు. మల్లెపూల వాసనలో మునిగిపోయిన గగన్, కొంత దూరం ముందుకు వెళ్లి బైక్ ఆపి వెనక్కి తిరిగి చూశాడు. ఒక వృద్ధుడు… వయసు దాదాపు 60 ఏళ్లకు పైనే ఉంటుంది. దగ్గరికి వస్తున్న కొద్దీ బైక్ బ్యాక్ లైట్ వెలుతురులో చేతికి టైటాన్ వాచ్, ఖద్దరు షర్ట్, వుడ్‌ల్యాండ్ స్లిప్పర్స్, మెడలో గోల్డ్ చైన్ కనిపించాయి. బాగా డబ్బున్న వ్యక్తిలా ఉన్నాడు. ముఖం మాత్రం సరిగ్గా గుర్తుపట్టలేకపోయాడు. పెద్దాయన లిఫ్ట్ అడిగేసరికి “ఎక్కడికి వెళ్తావు పెద్దాయనా?” అని అడిగాడు గగన్.ఆ వృద్ధుడు చెప్పిన స్టాప్ గగన్ వెళ్లే రూట్లోనే ఉండటంతో బైక్ ఎక్కించుకున్నాడు. బైక్ కదిలిన రెండు నిమిషాల తర్వాత ఆ వృద్ధుడు మెల్లగా, “బాబు… నీకు పెళ్లయిందా?” అని అడిగాడు.”ఆ… అయింది సార్” అన్నాడు గగన్.”బాబు, నా దగ్గర అండమాన్ దీవులకు వెళ్లే రెండు బోర్డింగ్ టికెట్స్ ఉన్నాయి. నేను, నా భార్య కలిసి వెళ్దామని బుక్ చేసుకున్నాం. కానీ ఆమె ఇప్పుడు ఈ భూమిపై లేదు. గత వారంలోనే ఒక దారుణమైన బైక్ యాక్సిడెంట్‌లో చనిపోయింది. ఇప్పుడు నాకు ఈ టికెట్స్‌తో పనిలేదు. నీకైనా ఉపయోగపడతాయేమో తీసుకో!” అన్నాడు ఆ వృద్ధుడు దీనంగా.మొదట నిర్మొహమాటంగా వద్దని చెప్పినా, ఆ వృద్ధుడు వదలకుండా బలవంతం చేయడంతో ఆ టికెట్లను తీసుకున్నాడు గగన్. వృద్ధుడిని అతని స్టాప్‌లో దించేసి, మనస్ఫూర్తిగా థాంక్స్ చెప్పి ఇంటికెళ్లాడు. మాధవికి ఆ టికెట్స్ చూపించి విషయం చెప్పాడు. మాధవి ఎంతో సంతోషించి, అసలు అవి నిజమైనవేనా కాదా కనుక్కోమంది. తెలిసిన ఫ్రెండ్‌తో చెక్ చేయిస్తే అవి ఒరిజినల్ టికెట్లే అని తేలింది. పెళ్లయిన మొదటి మూడు రాత్రులు తప్ప మరే సుఖం లేని ఆ కొత్త జంటకు ఫ్రీగా వచ్చిన ఈ ఆఫర్ వదులుకోవడం ఇష్టం లేక, దేవుడిచ్చిన హనీమూన్ ట్రిప్‌లా భావించి ఇద్దరూ అండమాన్ దీవులకు బయలుదేరారు.అండమాన్ వెళ్లిన కొత్తలో గగన్, మాధవి ఇద్దరూ ఎంతో సంతోషంగా గడిపారు. జీవితంలో మొదటిసారి అన్ని కష్టాలు, అప్పులు, EMIల భారం మరిచిపోయి.. ఒకరినొకరు చూసుకుంటూ మురిసిపోయారు. కానీ, ఆ సంతోషం ఎంతో కాలం నిలవలేదు.
ఒకరోజు ఉదయం.. చుట్టూ కొండలు, పచ్చని ప్రకృతి మధ్య ఉన్న ఒక అందమైన వ్యూ పాయింట్ దగ్గర ఇద్దరూ నడుస్తున్నారు. అప్పటివరకు ప్రశాంతంగా ఉన్న వాతావరణం ఒక్కసారిగా మారిపోయింది. కొద్దిరోజులుగా కురుస్తున్న భారీ వర్షాల వల్ల, ఊహించని విధంగా కొండ పైభాగం నుండి ఒక్కసారిగా వికటాట్టహాసం చేస్తూ భారీ కొండచరియలు విరిగిపడటం (Landslide) సంభవించింది.పెద్ద పెద్ద బండరాళ్లు, టన్నుల కొద్దీ మట్టి ఉరుముకుంటూ కిందకు వస్తున్నాయి. ఏం జరుగుతుందో అర్థమయ్యేలోపే చుట్టుపక్కల జనాలు ప్రాణభయంతో కేకలు వేస్తూ పరుగులు తీశారు. గగన్, మాధవి చేతులు పట్టుకుని పరిగెత్తబోయారు.. కానీ విధి చాలా బలంగా తన్నింది. ఒక భారీ బండరాయి వాళ్లిద్దరి మధ్యలో వచ్చి పడటంతో చేతులు విడిపోయాయి.
గగన్ కళ్ల ముందే… అంతలోనే కొండలా విరిగిపడిన మట్టి ప్రవాహం మాధవిని ముంచెత్తింది. “గగన్..!” అంటూ ఆమె గాల్లోకి లేచిన ఆఖరి కేక, ఆ కొండల మధ్య ప్రతిధ్వనిస్తూ ఒక్కసారిగా ఆగిపోయింది.”మాధవీ…!” అని గగన్ గొంతు పగిలేలా అరుస్తూ, చేతులతో ఆ మట్టిని, రాళ్లను పిచ్చివాడిలా పీకేయడం మొదలుపెట్టాడు. గోళ్లు ఊడిపోయి రక్తం వస్తున్నా పట్టించుకోకుండా ఏడుస్తూనే ఉన్నాడు. కానీ లాభం లేకపోయింది. వందల అడుగుల మట్టి కింద కూరుకుపోయిన ఆమె శవాన్ని కూడా దక్కించుకోలేకపోయాడు. ఆ బాధను, ఆ నరకాన్ని తట్టుకోలేక ఒంటరిగా, గుండెల్లో ఒక శ్మశానాన్ని మోస్తూ, పిచ్చివాడిలా ఏడుస్తూ వెనక్కి తిరిగి ఊరికి వచ్చాడు గగన్.గుండె పగిలేలా ఏడుస్తూ ఇంటి ముందుకు చేరుకున్న గగన్‌కు అక్కడో ఘోరమైన దృశ్యం కనిపించింది. తను ప్రాణం కంటే ఎక్కువగా చూసుకున్న అతని బైక్… ఎవరో కావాలని పగలగొట్టినట్లు రోడ్డుపై ముక్కలు ముక్కలుగా యాక్సిడెంట్ అయి పడి ఉంది.ఆ షాక్ నుండి తేరుకోకముందే, ఆ ముక్కలైన బైక్ హ్యాండిల్‌కు ఒక వస్తువు తగిలించి ఉండటం గగన్ కంట పడింది. దగ్గరికెళ్లి చూసిన గగన్ గుండె ఒక్కసారిగా ఆగిపోయినంత పనైంది. అది… ఆ రోజు చీకట్లో లిఫ్ట్ అడిగిన వృద్ధుడి చేతికి ఉన్న, అలాగే ఫ్లాష్‌బ్యాక్‌లో వర్షం కురుస్తున్న రాత్రి తను గుద్ది చంపేసిన వ్యక్తి చేతికి ఉన్న అదే ‘టైటాన్ వాచ్’.అప్పుడు గగన్‌కు అసలు నిజం అర్థమైంది. ఆ రోజు వృద్ధుడి రూపంలో లిఫ్ట్ అడిగింది మనిషి కాదు… తను చేసిన పాపమే అదృశ్య శక్తిగా మారి తన ముందుకు వచ్చింది!”నువ్వు నా భార్యను బైక్ యాక్సిడెంట్‌లో ముక్కలు ముక్కలుగా చేసి చంపావు. అందుకే నీ బైక్‌ను ముక్కలు చేశాను… నీ భార్యను నీకు కాకుండా చేశాను” అని ఆ వాచ్ గగన్‌ను చూసి వెక్కిరిస్తున్నట్లు అనిపించింది.తాను చేసిన కర్మ తిరిగి తననే ఎలా వెంటాడిందో తెలిసి, నెత్తీ నోరూ బాదుకుంటూ ఆ ముక్కలైన బైక్ ముందు మోకాళ్లపై కూలబడ్డాడు గగన్. చుట్టూ చీకటి ముసురుకుంటుండగా అతని ఏడుపు ఆ నిశ్శబ్దంలో ప్రతిధ్వనించింది