కాలేజీ ప్రేమ – ఐ సి యూ ( పార్ట్ 3)

24 అవర్స్ ఇంటెన్సివ్ కేర్ లో ఉంచిన తర్వాత..

” డాక్టర్! మా స్టూడెంట్ కి ఎట్లా ఉంది? ” శ్రవణ్ కుమార్ సార్ డాక్టర్ని అడిగాడు.

” ఇప్పుడు స్టేబుల్‌గా ఉన్నాడు. కానీ కొంతకాలం పూర్తిగా రెస్ట్ తీసుకోవాలి. “

” ఏమైంది డాక్టర్? “

” మీ వాడికి ఒక హార్ట్ కండిషన్ ఉంది. hypertrophic cardiomyopathy. “” అంటే డాక్టర్?” 

” అంటే… మీ వాడికి Hypertrophic Cardiomyopathy ఉంది. సింపుల్‌గా చెప్పాలంటే, మీ వాడి గుండె కండరం సాధారణం కంటే మందంగా పెరిగింది. దాని వల్ల గుండె పనితీరులో సమస్య ఏర్పడి, హార్ట్‌బీట్ ఒక్కసారిగా అదుపు తప్పింది. దాంతోనే మీ వాడికి స్పృహ తప్పింది.”

“ఓహ్, డాక్టర్ ఇది పూర్తిగా  తగ్గిపోతుందా? “

” పూర్తిగా క్యూర్ చేయడం సాధ్యం కాదు. కానీ భయపడాల్సిన అవసరం లేదు. మెడిసిన్స్, రెగ్యులర్ చెకప్స్‌తో దీన్ని కంట్రోల్‌లో ఉంచొచ్చు. ప్రస్తుతం మీ వాడి కండిషన్ స్టేబుల్‌గా ఉంది. ఇక నుంచి మాత్రం కొన్ని జాగ్రత్తలు తప్పనిసరిగా పాటించాలి. కానీ… మీ వాడికి ఇలా స్పృహ తప్పడం ఇదే మొదటిసారి కాబట్టి, దీన్ని మాత్రం సీరియస్‌గా తీసుకోవాలి.”

” అట్లాగే డాక్టర్. థ్యాంక్ యూ “

డాక్టర్ వెళ్ళిపోయారు. నా కళ్ళు నెమ్మదిగా తెరుచుకున్నాయి.

“ఇప్పుడేట్లా ఉంది?” అంటూ శ్రవణ్ సార్.

“బానే ఉంది సార్.”

“అసలు ఏమైంది?”

“ఏమో సార్… ఒక్కసారిగా ఊపిరి అందనట్టుగా అనిపించింది. కళ్ళు తిరిగినట్టు అనిపించింది. అంతే… తర్వాత ఏం జరిగిందో నాకు తెలీదు.”

“నీకు ఇంకా విషయం తెలియదు అనుకుంటా! నీకొచ్చింది మామూలు కళ్ళు తిరగడం గాదు… Hypertrophic Cardiomyopathy! ఫస్ట్ టైమ్ కాబట్టే పెద్ద ప్రమాదం తప్పింది. ఇకపై జర జాగ్రత్తగా ఉండాలి.”

“Hypertrophic… హా? అంటే ఏమిటి సార్?”

“అంటే నీ గుండె కండరం సాధారణం కంటే మందంగా పెరిగిందట. అందుకే ఇక నుంచి కొన్ని జాగ్రత్తలు తప్పనిసరి.”

“అంతేనా సార్?”

శ్రవణ్ సార్ నా వైపు చూసి కాసేపు ఆగాడు.
“అంతే కాదు… కొన్ని విషయాల్లో నువ్వు చాలా జాగ్రత్తగా ఉండాలి. సరే, నేను కాలేజీ కి వెళ్ళాలి. బయట మీ ఫ్యామిలీ, రహీమ్ ఉన్నారు. ఉంటా! ”  అంటూ వెళ్ళిపోయారు.

సార్ ఏంటి అలా చూసారు? సరేలే… నాకెందుకులే! నన్ను చూడటానికి కాలేజీ మొత్తం వస్తుందని అనుకుంటే, బయట ఎవరు లేరు ఏంటి?

ఇలా నాలో నేనే ఆలోచించుకుంటునప్పుడు ఐసీయు అద్దంలో చూస్తే శ్రవణ్ సార్ మా ఫ్యామిలీతో ఏదో చెబుతున్నారు. వాళ్ళ మాటల మధ్యలో రహీమ్ మరియు నా చెల్లి లోపలికి వచ్చారు.

” మామా రహీమ్! రా, చెల్లి ఫ్రూట్స్ ఏమి తీసుకురాలేదా?”

” లేదు రా! ఇప్పటికే చాలా ఖర్చు అయిందని తీసుకురాలేదు. ” అంటూ నా చెల్లి.

నా చెల్లికి నేనంటే కొంచెం ఎటకారం ఎక్కువ! ఎంతైనా వైజాగ్ లో పెరుగుతుంది కదా! 

” పోవే! మామా రహీమ్ రా కూర్చో.”

” మామా! అబ్ కైసా హై?  బాగున్నావా? ఫుల్ హుషారుగా కనిపిస్తున్నావ్? “

” ఐయామ్ ఒకే! బయట సార్ ఏంటి మా ఫ్యామిలీతో ఏదో చెబుతున్నారు? “

” గదే మామా! అబ్ strenuous exercise చేయకూడదని చెబుతుండ్రు! ”

” చేస్తే ఏమవుతుందంటా? ”

” చేస్తే! తమరు ఇక ఉండరు అంటా! ఈ భూమికి సెలవు చెప్పి, ఆకాశానికి ఎగిరిపోతారంటా! ”  అంటూ వెటకారంగా మా చెల్లి.

” నువ్వు నోర్ముయ్! అసలు నువ్వు నాకు చెల్లిగా ఎలా పుట్టావే? “” నాది కూడా సేమ్ ఫీలింగ్.” అంటూ అటు తిరిగింది.” దాని సంగతి వదిలే! మామా నువ్వు చెప్పు! ”

” మామా, తను బోలిన కదా! వో పాయింట్ కరెక్ట్ హై. అబ్ నువ్వు స్ట్రాన్యూస్ ఎక్సర్సైజ్ లు  బంద్ చేయాలి. లేదంటే జరా డేంజర్.”

” మామా strenuous exerciseలు అంటే ఏంటి? నేనెప్పుడు వినలేదే.”

” ముఝే భీ నహీ పతా మామా! బహర్ సార్ బోల్ రహే థే, విన్నా… అబ్ తుమ్ ఫాస్ట్‌గా రన్ చేయకూడదు అట. “

హీ హి అంటూ నా చెల్లి నవ్వుతుంది.
” వీడు వాకింగే చేయడు. అలాంటిది రన్నింగ్. అది కూడా ఫాస్ట్ రన్నింగ్. కామెడీ! ”

” నువ్వు కొంచెం సక్కగా ఉంటావా చెల్లి!  రన్నింగ్ అయితే నో ప్రాబ్లం. ఇంతేనా! దీనికే ఇంత సేపు మాట్లాడుతున్నారా? ”

” ఇంకా ఉంది మామా! ”

” జిమ్ చేయకూడదు, ఈత కొట్టకూడదు, ఫుట్బాల్ ఆడకూడదు ముఖ్యంగా నీకు చాలా చిరాకైన పని ఎత్తైన ప్రదేశాలు ఎక్కకూడదు. “

” ఎత్తైనవి అంటే మెట్లు హ? “

” కాదు రా! కొండలు రా కొండ గొర్రు! “

” ఈ సంగతి పక్కన పెట్టు మామా! ఫ్రెషర్స్ మీట్ ఏమైంది? జరిగిందా? లేదా? “

రహీమ్ ఇది చెప్పేలోపు ఐసియు డోర్ తీసుకొని మా మమ్మీడాడీ లోపలకి వచ్చారు.

రాగానే మా మమ్మీ ఒకటే ఏడుపు! మా డాడీ ఆమెను ఓదారుస్తూ! ” ఈరోజు ఈవెనింగ్ డిశ్చార్జ్ అవ్వచ్చు అంటా! అలాగే మీ సార్ నీకు అంతా చెప్పాడంటా కదా! రేపటి నుండి అదే నీ డైలీ రొటీన్. ఇంటిలోనే ఉంటూ మీ మమ్మీ పెట్టింది తిని టాబ్లెట్స్ వేసుకోవాలి! నేను రెండు మూడు రోజులు ఉండకపోవచ్చు. ఆఫీసు పని మీద ముంబై వెళ్లాలి. సరే నా.”

” సరే డాడీ! “అంటూ మనసులో ఇలా అనుకున్న: ఒక్క డైలాగ్ తో న్యూస్ టీవీ యాంకర్స్ అందరినీ గుర్తుచేశాడు. ఎనీవే, డాడీ అయితే ఇంటి దగ్గర ఉండరు! మమ్మీ నేను ఎలా చెబితే అలా వింటుంది.  కానీ రేపటి నుండి రోసిని చూడడం కుదరదు! హా ఎన్ని రోజులు రోసిని చూడకుండా ఉండాలి. తన వల్లే నాకిలా జరిగిందని తెలిస్తే, జాలి కలుగుతుంది. అమ్మాయిలకి జాలి కలిగితే ప్రేమించేస్తారు.అంటే తను నన్ను ప్రేమించేస్తుంది.

” రేయ్ కన్నా! నిన్ను ఇలా చూస్తుంటే నాకు ఏడుపు ఆగడం లేదు.. ” అంటూ మా మమ్మీ సౌండ్ చేస్తూ ఏడుస్తుంది.

ఇంతలో నర్స్ లోపలకి వచ్చి ” ప్లీజ్ పేషెంట్ ని డిస్టర్బ్ చేయకండి. ఎవరో ఒకరు ఇక్కడ ఉండి మిగిలిన అందరూ బయటికి వెళ్ళండి! ” అనేసరికి రహీమ్ ఒక్కడే ఉన్నాడు.

అబ్బా… రహీమ్ ఒక్కడే ఉన్నాడు. ఇప్పుడు వాడిని అడిగితే ఫ్రెషర్స్ డేలో ఏం జరిగిందో మొత్తం తెలుస్తుంది.