మృత్యువు తొడిగిన పూలదండ భాగం (2)

భాగం 2
కథ: మృత్యువు తొడిగిన పూలదండ
రైటర్: కృష్ణ పేర్ల


స్థలం: CI చంద్రమౌళి రూమ్.
ఏసీ చల్లగా తిరుగుతోంది. టేబుల్ అవతల భూపతి రెడ్డి (48) కూర్చుని ఉన్నాడు. ఖరీదైన సిల్క్ షర్ట్, చేతికి బంగారు బ్రాస్‌లెట్. ముఖంలో రాజసం ఉంచడానికి ప్రయత్నిస్తున్నాడు, కానీ కళ్లల్లో వ్యాపారవేత్తకు ఉండే ఒక రకమైన ఆందోళన, కంగారు స్పష్టంగా కనిపిస్తున్నాయి.చంద్రమౌళి నెమ్మదిగా లోపలికి వచ్చి తన కుర్చీలో కూర్చున్నాడు.

భూపతి రెడ్డి: (చంద్రమౌళి కూర్చోగానే సిగరెట్ కేస్ తీస్తూ) సారీ చంద్రమౌళి గారు, మీ పర్మిషన్ లేకుండా సిగరెట్ కాలుస్తున్నందుకు… కొంచెం ప్రెజర్‌లో ఉన్నా. ఎందుకంటే నా సొంత రిసార్ట్‌లో, నా కంపెనీ చీఫ్ ఆడిటర్ రవికుమార్ ఇలా చనిపోవడం నన్ను బాగా డిస్టర్బ్ చేసింది.

చంద్రమౌళి: (భూపతి వైపు పదునుగా చూస్తూ) “మీ సొంత రిసార్ట్‌లో…” అవును భూపతి గారు. ఈ కొండ ప్రాంతంలో వందల కోట్లు పెట్టి కట్టిన లగ్జరీ హనీమూన్ రిసార్ట్ మీదే కదా. అక్కడ ఇలా ఒక మర్డర్ జరిగితే ఎవరైనా డిస్టర్బ్ అవుతారు. మీ రిసార్ట్ లో సేఫ్టీ లేదని, ఇకపై రావడం మానేస్తారు.

భూపతి రెడ్డి: (లైటర్ వెలిగిస్తూ) అదే  నా మెయిన్ ప్రాబ్లం. అసలే ఇది టూరిజం సీజన్. రేపు పొద్దున పేపర్లలో, మీడియాలో ‘భూపతి రెడ్డి రిసార్ట్‌లో మర్డర్’ అని వస్తే… నా బిజినెస్ పడిపోతుంది. రిసార్ట్‌లో మనిషి చనిపోతే ఇక ఇక్కడికి ఫ్యామిలీస్, కపుల్స్ ఎవరు వస్తారు? నా పరువు పోతుంది, బిజినెస్ నాశనమైపోతుంది. అందుకే… ఈ కేసుని ఎంత త్వరగా వీలైతే అంత త్వరగా క్లోజ్ చేయండి. పై నుంచి మినిస్టర్ గారితో కూడా మాట్లాడించాను, ఆయన కూడా త్వరగా కానివ్వమన్నారు.

చంద్రమౌళి: (టేబుల్ మీద పెన్ తిప్పుతూ, అనుమానంగా కళ్లు చిన్నవి చేసి) “కేసుని త్వరగా క్లోజ్ చేయండి…” సరే,  మీ బిజినెస్ భయం నాకు అర్థమైంది భూపతి గారు. కానీ నాకొక చిన్న డౌట్. కేసు త్వరగా క్లోజ్ చేయాలంటే… నేరస్థుడు ఎవరో తేలాలి కదా? మీ దృష్టిలో ఎవరు చంపారు?

భూపతి రెడ్డి: ఇంకెవరు సార్? ఆ లావణ్యే! పెళ్లయిన పద్దెనిమిది రోజులకే రవి ఆస్తి మొత్తం తన పేరు మీద రాయించుకుంది. ఆ డబ్బు కోసమే రవికి విషం ఇచ్చి చంపేసిందని నా గట్టి నమ్మకం. పైగా నిన్న రాత్రి రవి చనిపోవడానికి జస్ట్ పది నిమిషాల ముందే… అంటే 10:15 కి నేను రిసార్ట్ రిసెప్షన్‌కి ఫోన్ చేసి రవితో మాట్లాడాను. ఆ టైమ్‌లో కూడా ఆవిడ ప్రవర్తన ఏదో తేడాగా ఉందన్నాడు రవి.

చంద్రమౌళి: (భూపతి ముఖంలోకి తీక్షణంగా చూస్తూ) “రవితో మాట్లాడారు…” రాత్రి పదింబావుకి, మీ ఆడిటర్‌తో అంత అర్జంట్‌గా ఏం మాట్లాడారు భూపతి గారు?

భూపతి రెడ్డి: ఆఫీస్ మ్యాటర్స్ సార్. అయినా నేను ఎక్కడో వైజాగ్ సిటీలో ఉండి ఇక్కడ విషం ఎలా ఇస్తాను? రూమ్ లోపల ఉన్న లావణ్యే కదా ఆ పాలు గానీ, టీ గానీ రవికి ఇవ్వాలి? కాబట్టి ఆవిడ యాంగిల్‌లోనే కేసు క్లోజ్ చేస్తే, నా రిసార్ట్ పరువు దక్కుతుంది… రవి ఆత్మకైనా శాంతి కలుగుతుంది.

చంద్రమౌళి: (కుర్చీలో వెనక్కి ఆనుతూ) “ఆవిడ యాంగిల్‌లోనే…” బాగుంది. కానీ రాత్రి 10:30 కి రూమ్ నంబర్ 204 కి గ్రీన్ టీ పట్టుకెళ్లిన రూమ్ సర్వీస్ బాయ్ ఫోటో మాకు దొరికింది. విచిత్రం ఏంటంటే, మీ రిసార్ట్ డ్యూటీ లిస్ట్‌లో ఆ ముఖం ఉన్న వెయిటర్ లేడు. కానీ… మీ పర్సనల్ సెక్యూరిటీ టీమ్‌లో ఉండే ‘శివ’ అనే వ్యక్తి ముఖ చాయలు దీనికి చాలా దగ్గరగా ఉన్నాయి. శివ నిన్న మీతోనే ఉన్నాడా?

భూపతి రెడ్డి: (నుదుటి మీద చెమట పడుతుండగా, గొంతు పెంచుతూ) శివ నిన్న రాత్రంతా నాతోనే ఉన్నాడు సార్. ఆ ఫోటో ఏదో బ్లర్‌గా ఉంది అంటున్నారు కదా, పొరపాటు పడుతుండొచ్చు. అయినా రవి ల్యాప్‌టాప్ మీ దగ్గరే ఉంది కదా? అందులో కంపెనీ డేటా ఉంటుంది, అది నాకు హ్యాండోవర్ చేస్తే నేను క్లైంట్స్ కి సమాధానం చెప్పుకుంటా.

చంద్రమౌళి: (చంద్రమౌళి పెన్ తిప్పడం ఆపాడు. చూపులు మరింత పదునయ్యాయి) “రవి ల్యాప్‌టాప్ నా దగ్గరే ఉంది కదా…” అని మీరెలా అనుకున్నారు భూపతి గారు? నేను ల్యాప్‌టాప్ దొరికిందని మీకు చెప్పలేదు. ఇందాక కానిస్టేబుల్ శ్రీను కూడా మీతో ఆ మాట అనలేదు. మరి క్రైమ్ సీన్ నుండి ల్యాప్‌టాప్ మాయమైందనే విషయం… రూమ్‌లో ఉన్న లావణ్యకి, దాన్ని ఇన్వెస్టిగేట్ చేసిన మా ఫోరెన్సిక్ టీమ్‌కి తప్ప… బయట ఎవరికీ తెలియడానికి వీల్లేదు. మీకు ఎలా తెలిసింది?

భూపతి రెడ్డి: (ఒక్కసారిగా తడబడుతూ, కుర్చీలో సర్దుకుంటూ) అది… అది రవి భార్య లావణ్యే ఇందాక కారిడార్‌లో కానిస్టేబుల్‌తో ల్యాప్‌టాప్ పోయిందని చెప్తుంటే నేను విన్నాను సార్! మీరు నన్ను అనవసరంగా అనుమానిస్తున్నారు. రిసార్ట్ నాది కాబట్టే కేసు త్వరగా తేల్చమంటున్నాను, అంతకంటే నాకేం అవసరం?

చంద్రమౌళి: (నెమ్మదిగా లేచి నిలబడి, భూపతి భుజం మీద చేయి వేస్తూ) “అంతకంటే మీకేం అవసరం…” కరెక్టే కావచ్చు భూపతి గారు. మీ రిసార్ట్ బిజినెస్ దెబ్బతినకూడదనే మీ ఆరాటం నిజమే కావచ్చు. కానీ… ఆ ల్యాప్‌టాప్‌లో మీ కంపెనీకి సంబంధించిన వందల కోట్ల స్కామ్ ఫైల్స్ ఉన్నాయని, రవి దాన్ని బయటపెడతానని మిమ్మల్ని బెదిరించినందుకే, కేసు లావణ్య మీదికి వెళ్లేలా ప్లాన్ చేసి మీ మనిషి శివ ద్వారా విషమిచ్చి చంపించారేమో అనే యాంగిల్‌ని కూడా నేను వదిలేయలేను.

(చంద్రమౌళి గొంతు తగ్గించి, భూపతి కళ్లలోకి చూస్తూ)

ప్రస్తుతానికి మీరు టౌన్ దాటి వెళ్లడానికి వీల్లేదు. మీ స్టేట్‌మెంట్ రికార్డ్ అయింది. మీరు వెళ్ళొచ్చు.

భూపతి రెడ్డి: (కోపంగా, భయంతో లేచి నిలబడి) చూద్దాం చంద్రమౌళి గారు! (అంటూ వేగంగా బయటికి నడిచాడు)భూపతి వెళ్ళిపోయాక చంద్రమౌళి విచారణ గది వైపు నడిచాడు. అతని మైండ్ పూర్తిగా గందరగోళంలో పడిపోయింది.
భూపతి చెప్పినట్టు రిసార్ట్ బిజినెస్ పాడవుతుందనే భయం నిజమే కావచ్చు, లేదా ఆ భయం ముసుగులో తన నేరాన్ని, మాయమైన ల్యాప్‌టాప్‌ను దాచడానికి చూస్తున్నాడా?


అటు చూస్తే లావణ్య… భర్త చనిపోయిన దుఃఖంలో ఉంటూనే, ప్రతి సాక్ష్యాన్ని భూపతి మీదికి నెట్టేలా చాలా ప్లాన్డ్‌గా మాట్లాడుతోంది.
ఇద్దరిలో ఎవరు నేరం చేశారు? చంద్రమౌళి విచారణ గది తలుపు తీశాడు. లావణ్య ఇంకా అక్కడే కూర్చుని ఉంది. ఆమె కళ్లల్లో నీళ్లు ఉన్నాయి, కానీ ఆమె వెన్ను ఇప్పటికీ నిటారుగా ఉంది. ఆ నిటారుగా ఉన్న వెన్నుపూస వెనుక… ఒక సామాన్య టీచర్ భయం ఉందా? లేక ఒక క్రూరమైన మాస్టర్‌మైండ్ ప్లాన్ ఉందా? చంద్రమౌళికి అర్థం కావడం లేదు.